SuperDizionari

sù par loc.prep.

Par introdusi un complement di lûc, soredut cun moviment che al travierse di jù insù o di meridion a setentrion

esemplis

"lui come instupidît si invià ben planc sù pes scjalis e cuant che al fo disore, cjamare, jê i le dongje"

gjavât fûr di "Sul agâr" di Pieri Menis

"si podeve lâ sù te specule, sù pe torate, là che al è ancjemò l'orloi"

gjavât fûr di "La teme - Une gnot intun cjastiel" di Giovanni Gortani

sù par loc.prep.

Par introdusi un complement di lûc, ancje cence moviment, in riferiment a alc che al è adalt o verticâl

esemplis

"une schirie di plats piturâts a man a jerin picjâts sù pai mûrs e o vevi vût timp di lei lis frasis che a jerin scritis parsore"

gjavât fûr di "B123ST" di Raffaele Serafini

sù par loc.prep.

Par segnâ un supuart, soredut par alc che al è scrit

sinonims

in, ta, su

esemplis

"nissun si varès mai plui visât di lôr, fûr che sù pes lapidis o tal cûr des maris"

gjavât fûr di "Îr e doman" di Gianni Gregoricchio

"cjasis vieris butadis jù, gnovis fatis sù come chês che si viôt sù pai gjornâi"

gjavât fûr di "Fûr di timp" di Jolanda Mazzon

sù par loc.prep.

In ciertis varietâts ancje par segnâ une direzion, une destinazion e v.i. che si podaressin pandi cu la preposizion "su" o cu la locuzion "su di"

sinonims

su, su di

esemplis

"lui non si varès mai riscjât di alsâ i voi sù par jê in considerassion dal stât miserabil che si cjatava"

gjavât fûr di "Nita e Nesto" di Ranieri Mario Cossâr

sù par loc.prep.

In ciertis varietâts, ancje par introdusi il complement di argoment

sinonims

su, in fat di, in cont di, sul cont di

esemplis

"il plait sù pal matrimoni, sù par Nart , sù pal stât di Line, sù pal avignî che le spietave, sù pe convenience di cjoli Nart e sù pe sigurece che chel matrimoni ur varès dât a dutis dôs, al durà a lunc, fin miezegnot passade"

gjavât fûr di "Cretevierte" di Roberto Ongaro

monolengâl